Neach-gleidhidh

Tha cothrom obrach aig a’ Cholaiste airson Neach-gleidhidh a bhios a’ fuireach air an àrainn aig an Ionad Nàiseanta airson Cànan is Cultar na Gàidhlig ann an Slèite ann an ceann a deas an Eilein Sgitheanaich. ’S e obair chudromach a th’ ann an dreuchd an Neach-ghleidhidh ann an coimhearsnachd na Colaiste is bhiodh tu a’ dearbhadh gu bheil àrainn shàbhailte ann do na h-oileanaich is aoighean againn agus a’ toirt seachad cùram do dh’oileanaich taobh a-muigh uairean oifis na Colaiste. ’S e dreuchd mheasgaichte a tha seo is tu a’ cumail taic ris an sgioba chàraidh gus am bi an àrainn againn ag obrachadh gu h-èifeachdach, a’ cumail taic ri oileanaich is aoighean aig a’ Cholaiste agus bidh thu an làthair taobh a-muigh uairean oifis airson dèiligeadh ri cùis no èiginn sam bith a dh’èireas.

Bu chòir gum bi eòlas beatha/obrach agus deagh sgilean conaltraidh is pearsanta aig tagraichean. Feumaidh tu a bhith fileanta sa Ghàidhlig airson taic a chumail ri oileanaich is iad a’ neartachadh an cuid Gàidhlig air an àrainn bogadh cànain againn. Leis gu bheil e mar fhiachaibh gum bi an neach-gleidhidh a’ fuireach air àrainn na Colaiste, tha àite-fuirich  – flat le dà sheòmar-cadail  – an lùib sochairean na h-obrach. ’S e an neach-gleidhidh fhèin a phàigheas cìs na comhairle.